Ae Fond Kiss

Ae fond kiss, and then we sever;
Ae fareweel, and then forever!
Deep in hert-wrung tears I’ll pledge thee,
Warring sighs and groans I’ll wage thee.

Wha shall say that fortune grieves him,
While the star o hope she leaves him?
Me, nae cheerfu twinkle lichts me;
Dark despair aroond benichts me.

I’ll ne’er blame my partial fancy,
Naethin could resist my Nancy;
But tae see her was tae love her;
Love but her, and love forever.

Had we never loved sae kindly,
Had we never loved sae blindly,
Never met or never pairted
We’d nae been sae broken-hairted.

Fare thee weel, thou first and fairest!
Fare thee weel, thou best and dearest!
Thine be ilka joy and treisure,
Peace, enjoyment, love, and pleisure!

Ae fond kiss, and then we sever;
Ae fareweel alas forever!
Deep in hert-wrung tears I’ll pledge thee,
Warring sighs and groans I’ll wage thee!