Gloomy Winter’s Noo Awa

Gloomy Winter’s Noo Awa
by Robert Tannahill

Gloomy winter’s noo awa
Saft the westlin breezes blaw,
Amang the birks o Stanely Shaw,
The mavis sings fu cheerie, O.

Sweet the crawflooer’s early bell,
Decks Gleniffer’s dewy dell,
Bloomin like yer bonnie sel,
My ain, my darlin dearie, O.

Come my lassie, let us stray,
Ower Glenkilloch’s sunny brae
Blythely spend the gowden day
‘Midst joys that never weary O.

Towerin ower the Newton wuds,
Laverocks fan the snaw-white cluds,
Siller sauchs wi downie buds,
Adorn the banks sae brierie O.

Roon the sylvan fairy neuks,
Featherie breckans fringe the rocks,
Neath the brae the burnie jouks,
And ilka thing is cheerie O.

Trees may bud and birds may sing,
Flooers may bloom and verdure spring,
But joy tae me they canna bring,
Unless wi ye my dearie O.