The field by the lirk o the hill

The field by the lirk o the hill
by Violet Jacob

Daytime and nicht,
Sun, wind and rain;
The lang, cauld licht
O the spring months again.
The yaird’s aa weed,
And the fairm’s aa still –
Wha’ll sow the seed
In the field by the lirk o the hill? (lirk – fold, irregularity)

Prood maun ye lie,
Prood did ye gang;
Auld, auld am I,
But O! life’s lang!
Ghaists in the air,
Whaups cryin shrill, (whaups – curlews)
And you nae mair
In the field by the lirk o the hill –
Aye, bairn, nae mair, nae mair,
In the field by the lirk o the hill!