Hoast

Jamie’s on lockdoon at Grunny Buchan’s hoose. Grunny’s feedin him fish that mak him boke and his phone’s run oot o data. He could be there for weeks. Doric writer Shane Strachan explores the new world Jamie and his grunny have to face together in the first short story in Scots aboot the Covid-19 crisis.

It’s ma Da’s fault really. Een minute I wis aul enough tae bide at hame and look aifter masel while he wis swannin aboot Asia on a cruise wi his blonde, but add in a global pandemic, a grunny up tae high doh ower being stuck in her hoose alone and a wee incident in ma kitchen involvin the microwave explodin aifter I tried tae cook a tattie in tinfoil, I wis suddenly ower young and ower glaikit tae be left masel for as lang as Da wis stuck aff the coast o Phuket on a ship full o feverish octogenarians.